OMBWE LIMEJAA

OMBWE LIMEJAA

Na Labaan Shabaan

K

wenye taifa lililokonga

na kugonga nusu karne

Tunashurutika kushangilia

Hata kwenye kinamasi maishani

Tunabidika kusifu mawi yanayotuburuza

Wakati wengine wanadondoa wadudu

Kwenye nyama ili wale

Nyama choma,

Nyama kaanga

Karanga chapo

Kunao wanoteua nyama ya mafuta

Kwenye nyama safi na freshi

Kunao wanaoishi na kunguni

Ilhali wengine wamewaona

Magazetini, vitabuni, majaridani

Kuwasikia pia

Redioni, Runingani  

na  Kwenye masimulizi

M

bona linatujuzu kupendana kwenye vyombo vya usafiri

Madaladala, mabasi, tuk tuk ndege, meli, merikebu, boda boda…

Twaambiwa tukae wanne wanne ama wawili wawili na ndivyo ilivyo

Ni kwenye matatu iliyojaa fondogoo:

Ujaka wa kunyarafisha unukao mff na fee!

Unamsongea na kumsogelea hata aliyetoka jela jana

Twacheka na kuimba ndani ya basi lililobeba

Samaki, dagaa, mbuzi, kondoo waliao mtawalio

Na bado twapendana na kushangiliana mle mle

Wampa mwenzako Sambaza/Kadunga

Aketi sako kwa bako nawe

Hujali hubali

Ama heri punda afe na mzigo ufike?

Haya ndo maisha,

Maisha ya ashurutishwaye

Ili ajiite mwenye nchi

Mwenye nchi mwenye uwezo finyu

Uwezo wa kwenda debeni

Maamuzi mengine waonee runingani.

H

eri mvua izidi kunyesha sasa

Ili kazi yangu ya kuosha bata idumu

Mshahara wangu uzidi mvua ikinya

Bata ajichafue topeni

Na ninakuwa na kazi nyingi ya punda

Ni afueni aisee kwani tutalia wapi?

Mshahara haijambo hapa

Endapo hakunyeshi

Basi bata hachafuki

Na hivyo sina kazi

Swaleh Mdoe u wapi

Uwaambie watafakari hilo!

©December 2013